KOHANGA REO

I whakatahangia a Lynda Tāwhiwhirangi i te marama o Oketopa i tērā tau ao ake i ētahi whakapae raweke pūtea.

Heoi, na wai rā ka puta tēnei pukapuka me te wero i te take ko ia anake i ngaua.

E whakarārangi ana ko ngā whakapae raweke pūtea, hua whaiaro, ka mutu, ko ngā kaiwhakahaere me ngā mema poari te keonga.      

E iwa tekau mā rua miriona te pūtea kaiutu tāke ka tukuna ki Te Poari Matua ki te whakaako i ngā tamariki ki te reo Māori. Heoi, e ai ki te puka whakapae, kapi ana te Poari Matua me tana kamupene, me Te Pātaka Ōhanga, i ngā mahi raweke pūtea.

Ko tētahi whakapae, ko ngā pūtea taurewa i tukuna ki ngā mema poari, kaiwhakahaere o mua hoki. Apiti he pūtea taurewa hoko whare i tukuna ki tētahi kaiwhakahaere o mua, he pūtea nui ake i tērā ka tukuna ki ngā kōhanga, aa, kāore i tirohia wā te kaitono rawa, nama rānei.

Ahakoa kua whakaīngoatia ngā tāngata i roto i te pukapuka, ko te whakahē e hāngai ana ki ngā tukanga.

Pēnei i te hoko ā te Poari i tētahi motuka ono tekau mano tara mo tētahi tangata, he whakapaunga pūtea i hunaia i ngā puka pūtea a Te Pātaka Ōhanga kia kauparetia te tironga hōmiromiro a te hunga pāpāho.

Ko tētahi atu whakapae e mea ana i haere tahi ai ngā toihau o mua o te Poari Matua me Te Pātaka Ōhanga ki Haina me o rāua hoa rangatira ki te rapu taputapu mō ngā tari.

Kāore he hua i puta, ēngari, e ai ki te pukapuka he whakapaunga nui pea ki te tirohanga a ngā kōhanga reo.

E whakapaetia ana i haere hoki tetahi toihau o mua o Te Pātaka Ōhanga ki Ahitereiria ki te hoko whenua, ēngari, anō, auare ake. Waihoki, i haere tahi atu rāua ko te tangata i karangahia ki te arotake i ngā whakapae raweke pūtea o mohoa nei.

E meatia ana he maha ngā wā i whakamahia te kāri nama, te kāri penehini hoki, mo ngā haerenga whaiaro.

Ko te kōrero, karekau he kaupapa here hei ārai i tēnā mahi. 

Nōreira,  ki te kore he tikanga here, he whakahaere māhorahora te hua.

Ko ētahi atu whakapae e hāngai ana ki ngā whakapaunga pūtea, taonga, koha hoki, pēnei me:

- Tētahi waka hahaupōro i tukuna ki tētahi mema poari

- He pūtea taurewa rua tekau mano tāra i tukuna ki tētahi toihau o mua mō te hanga rīpene whakaata

- He koha toru mano tāra

- He whaina waka rua rau tāra

- He mōhiti

- Peita

- Wahie

- Me te whakatika i tētahi atu waka hahaupōro

E ai ki te whakatewhanga a te Ratonga Kaupapa Atawhai, ko ngā pūtea taurewa mō ngā haerenga whaiaro me ngā hokonga motukā whaiaro hoki kei waho atu i ngā tikanga whakahaere ā ngā mahinga kaupapa atawhai ā te Kohanga Reo, i hē rawa te whakahaere, i takahi rawa hoki i te ture.

I whakatauria e te Tari Hara Tāware, karekau he mahi takahi ture, ki te tirohia nga tikanga whakapaunga pūtea o Te Pātaka Ōhanga. Heoi, e mōhiotia ana ināianei karekau he tikanga i Te Pātaka Ōhanga. E ai ki te Tari Hara Tāware, tērā ngā korenga nui, i te taha whakahaere.

Ko te whakapae o te pukapuka hōu e mea ana, he aha te take i whakatahangia ai a Lynda Tāwhiwhirangi, ēngari rā anō ētahi atu. 

Kāti, kei te āta tirohia tonutia ēnei whakapae, heoi, i whakapā atu mātou ki Te Poari Matua, e ai ki tā rātou māngai ki a Derek Fox, kāre ia i te paku mōhio ki ngā whakapae o roto i te pukapuka nei ēngari hei tāna katoa ngā pukapuka kua tirohia e ngā rōpu arotake matua i te Kōhanga reo me Te Pātaka Ōhanga ā karekau he hara kua kitea noa. 

I te rangi nei panaia a Toni Waho e te poari mōna i whāki i ngā whakapae o roto i te pukapuka nei ki ngā Minita.

He tohe tēnei i eke rāno ki te kōti teitei, i hinga a Toni Waho, ā, hei tāna, ahakoa i whakatakoto pira ia ki te kōti i tērā wiki kua panaiahia tonutia.