Kotahi atu ana ngā rangatahi ki ngā kōrero whai kiko

Te Kuru o te Marama Dewes

Takiri ana te ata ki runga o Hikurangi, i te maru o te maunga tapu, i Ruatōrea, tū ai ngā whakataetae Manu Kōrero o Te Tairāwhiti.

Kotahi atu ana ngā rangatahi ki ngā kōrero whai kiko.

Hei tā Materoa Rewiri o Te Kura Kaupapa Māori o Horouta Wānanga, “He mate nui tēnei mea te whakamomori ki roto o Tūranganui a Kiwa, ā, hiahiatia e au ki te kōrero e pā ana ki tēnei kaupapa take ki tēnei o Ngā Mānu Kōrero.”

He tūāpapa tēnei e puta ai ngā whakaaro ā te rangatahi mō ngā take nui o te wā, arā, te mate hinengaro me te matepouri.

Ko tā Paenoa Pahuru Huriwai o Te Kura Kaupapa Māori o Kawakawa Mai Tawhiti, “Kua tino taikaha mātau i ēnei rangi, kia tino kore taringa nei, nō te mea kāre he kaha tō mātau te whakaputa i ō mātau whakaaro, kāre he kaha te whakaputa i ō mātau kare ā roto pēnei i tātau tuāhine.”

Ko tā te toa i te wāhanga Korimako, ko tā Materoa Rewiri o TKKM o Horouta Wānanga, he whakaputa i ngā kōrero mō te maha o ngā tāne Māori e whakamomori ana.

“Ko tōku akiaki noa ki ngā tāne o Aotearoa, ki te taumaha tētahi i runga i ōu pokohiwi, kōrero atu ki tētahi kia kaua e waiho noa i runga i ōu pokohiwi”, te kī a Materoa Rewiri.

Ko Tyson Bird te toa i te wāhanga reo Māori o Pei Te Hurinui Jones, he wero kia Māori ake ai ngā marau i rō kura.

“Mō te iwi Māori e kai ana i ngā kai ā te Pākehā, koia ko tāku e kōrero nei, homai ngā kōrero mō Te Kore, Te Pō, Te Ao, e mōhio ai au he wairua tōku, kāti te homai i ngā kōrero mō te matua, te tama, me te wairua tapu”, te kī a Tyson Bird.

Ā te Hepetema tū te whakataetae Manu Kōrero ā motu ki Te Papaioea.