Kua eke te whare tūpuna o Tuwharetoa-i-Te-Aupouri ki tōna tau kotahi rau

Ki Turangi, e whakanui ana te marae o Hirangi i te tau kotahi rau o tōna whare tūpuna, o Tūwharetoa-i-Te-Aupouri. Koirā te marae tuatahi i hangaia ki te rohe, ā, e whai nei i te huringa kotahi rau tau o tērā atu whare tūpuna o Ngāti Tūwharetoa arā, ko Pākira, i te marae o Waitahanui i tēnei tau. 

Ko te whare tūpuna o Tuwharetoa-i-Te-Aupouri i tapaina ki te ingoa o te rangatira o Ngāti Tūwharetoa kua eke ki tōna tau kotahi rau.

“Ko te mea pai ake ki ahau ko te whakawhanaungatanga i waenganui i a tātou,” i mea mai te māngai o te marae, a Ngaiterangi Smallman.

“Arā, ahakoa ngā uri o tēnei marae me ngā whanaunga marae o Te Mātāpuna. Ara, mai Pūkawa, ko Waihi, ko Tokaanu, ko Hikairo, ko Rongomai, ko Korohe, Ko Waitetoko, arā, ka haere kotahi mai tātou.”

“Ko te kite i ngā kaumātua me ngā tamariki nohinohi e takahi ana i te mata o tō mātou marae ātea,” i mea atu a Te Rewhanga-o-te-rangi Clendon-Smallman (Ngāti Tūrangitukua).

Ko te waka whakaairo o Te Hau-o-Tūnono e takoto nei hei whakarangatira i ngā tātai hono ki a Ngāti Omutahi o Kawerau.

“Ko te hononga o te whakawhanaungatanga o tētahi ki tētahi. Kei te mōhio te whakapapa o Tūrangitukua ki Ngāti Omutahi ko Tūwharetoa ki Te Tai,” i kōrero atu a Hone Te Rire (Tūwharetoa ki Te Tai).

“E pai tērā te whakawhanaungatanga ā kanohi nei, ā tīnana nei.”

Kua tuhia tētehi pukapuka hei whakamaumahara ki te whare tūpuna i hangaia i te tau tekau mā iwa rau tekau mā whitu. He wahakura i takohatia ki ngā uri whakaheke me ngā korowai e toru i rarangatia hei kākahu mō ngā pou tūpuna.

“Kia kaha ake te reo, te rere o te reo i runga i te marae atea,” te korero a Clendon-Smallman.

“Kia kaha hoki hoki mai ngā rangatahi pēnei ki ahau taku rereanga ki te hoki mai ki tō tātou marae.”

Ko te manako ia o te iwikāinga ka hoki hoki atu ngā uri e noho rāwaho ana, ki te marae.