Kua herea te arero o te heamana o Tūhoronuku e ngā roia

updated
Urgent hearing called by Waitangi Tribunal in Waitangi - Photo / file

Ki te rā tuarua o noho a te rōpu whakamana i te tiriti o Waitangi ki roto o Ngāpuhi, kua herea te arero o te heamana o Tūhoronuku e nga roia, nāreira he tangata anō i tuku hei reo mā rātou i te rā nei.

Ki waenganui i ngā uiuitanga me ngā waiata tautoko i ngā kaikorero a ngā hapū, ko ngā mema o te ropu Tūhoronuku e taria ana mō te wahanga kia rātou.

Ko Nora Rameka tēnā e mea ana, “Mahia te mahi ki runga i te tika me te pono.  Kia mātou e hīkoi ana mātou i tērā hīkoi i roto ia Tūhoronuku i tēnei wa nā te mea horekau atu i kitea tētahi huarahi ka taea ki te hikoi ki te whakaora i o tātou hapū me o tātou whānau i roto o Ngāpuhi.”

Ahakoa tēnei hui whakahirahira kua puta te kōrero kei te haere mua ngā mahi a Tūhoronuku i tēnei wā tonu ki te rapu i ngā tāngata tōtika hei noho ki te tēpu whiriwhiri a te karauna.

Hei tā Rameka, “Kua roa kē tātou e pōhara ana a Ngāpuhi.  Ka kōrero tonu tātou i ērā kōrero engari horekau kia puta mai ana me pehea ka ora tātou.  E kite ana au i roto i ngā hikoitanga i waenganui ia Tūhoronuku e kite atu ana au te huarahi kei muri i ēnei hīkoi.”

I tōna wā ko ia tētahi o ngā reo mō Te Kotahitanga o ngā hapū o Ngāpuhi i whakapau ai ōna kaha kia rite ngā kereme o Te Paparahi o te Raki.  Engari nō te huringa o te tautoko a Ngāti Rehia ki muri i te rōpu Tūhoronuku kua whakakiia e Nora te tūranga i nohia e Titewhai Harawira hei kuia mā Tūhoronuku.

E ai ki a Rameka, “E tino taimaha ētahi o ngā kōrero o ētahi o o tātou hapū engari kia mātou kia tau te rangimarie kia tātou kia tau te rangimarie kia tātou nā te mea hoki he take nui engari kia mahara tātou ehara mō tātou anake, mō a tātou mokopuna me a tātou tamariki.”

Ko ngā takawaenga o te karauna a Jim Bolger raua ko Tūkoroirangi Morgan ngā kaituku kōrero ki te aroaro o tēnei taraipiunara āpōpō.