Kua hinga te kōtuku rerengatahi nei a Esther-Jordan Muriwai

Lynette Amoroa
Esther-Jordan Muriwai

Nō te rā nei ka mutu te whawhai roa a Esther-Jordan Muriwai ki tētahi momo mate pūkahukahu kino rawa. He rua tekau ma toru ōna tau ka mate nei.

Tekau mā whā tau te roa o Esther e noho ana ki rō hōhipera, arā e whai oranga ana i te mate arahou kino rawa. He nui noa ake ngā tamariki Māori ka hinga i te mate nei i ērā o iwi kē. Ā, nā te kino o ēnei tatauranga i huri ake ai a Esther ki a Tākuta Lance O'Sullivan ki te whakatū i tētahi rōpū hōu hei āwhina i ngā whānau e ngauā ana e te mate nei.

E rua tau ki muri, ka huri tēnei tauira Kura Kaupapa, me tōna tohu mātauranga ki te whakarite i tōna ake ao. Ā, ka uru ia hei kaiwhakataetae ki Miss Aotearoa, ā, ka mutu tuarua mai a ia, hāunga ki tēra ka oti hoki i a ia tētahi pukapuka mā ngā taitamariki.

Kāore i mutu āna mahi i reira, no tēra tau ka tū ia hei kaiwhakataetae mō ngā kaikaunihera o Whangarei. E rua marama ki muri ka whakawhiwhia ki a ia tētahi tohu rangatira mō āna mahi nui mō te hunga mate huangō.

Ka whakahaerehia he karakia mōna ki te Whare Karakia o St Francis Xavier ki Whangarei hei āpōpō, i mua i tōna hokinga atu ki te Poho o Waimirirangi ki Waihou Marae, Hokianga hei te Rāhoroi.