Kua mahana te whare tipuna i ngā mahi toi, i te reo a te tamaiti

Te Kuru o te Marama Dewes

Ko te whakaaturanga toi Māori a Rangiwaho Ihu ki te Moana, he tūāpapa mā Ngāi Tāmanuhiri ki te whao i ngā kōrero tuku iho ake o te iwi hei whakaako atu ki ngā reanga hou i te hononga ki ngā taonga, ki te moana, ka mutu ki Rangiwaho marae i Te Tairāwhiti. 

Nō te taenga atu a ngā tamariki o te kura o Muriwai, ka mahana te whare tipuna i ngā mahi toi, i te reo a te tamaiti.

Hei tā Mihi Te Rina Harrington, “Ka kite ngā tamariki i ngā whakapapa pērā e whatawhata mai, ka kite rātau ngā whakapapa i konei i runga i te papa, ka kite rātau te whakapapa i runga rā. Ka tū tātau ki te mihi, he whakapapa anō tērā, ka waiata rātau, he whakapapa anō tērā mō Rangiwaho.”

I te taenga atu a te kaipuke Endeavour i te tau 1769, neke atu i te kotahi rau ngā taonga i whakawhitihia me Tuapaia.

Koia ko tā Kay Robin, “Rima tekau ngā tāne i hoe ki te waka Endeavour ki te kite i a Tupaia, i rongo mātau mō tēnei Ariki rongonui ki a mātau, ki a mātau, ko ia te rangatira o te waka Endeavour.”

Ināianei tata ki te whā tekau kua hoki taurewa atu i NGĀ whare taonga o rāwāhi ki te whare taonga o Te Tairāwhiti, koia te pūtake o tēnei nā whakaaturanga he whakanui i tērā kōrero tuku iho ki ngā toi o te ao hou.

Hei tā Kay Robin, “He mahi nō te ao hou, engari nō neherā ngā whakaaro, kei roto i ō ratau ngākau, hinengaro i o rātau whakapapa, kua puta ngā whakaaro i roto i ngā mediums nei.”

Ka mutu ko tā te whakaaturanga he tūhono atu i ngā ringatoi ki te iwi.

Koia ko tā Kay Robin, “Te nuinga o rātau e noho ana ki waho, mā ngā taonga nei ka whakahokia mai ō rātau whakaaro o rātau aroha, ka honohono rātau ki a mātau, ka mahana honohonotanga.”

Ko tā Mihi Harrington, “I te mutunga o te rā kāre mātau waiho ngā taonga ko rātau noa iho konei, i te pō ka moe mātau konei te taha o wēnei, ki te whakamahana rātau.”

He taonga hou, he kōrero tuku iho nō te iwi ake.