Kua piki ake a Mahuta raua ko Davis i te rārangi mema pāremata o Reipa

Andrew Little announces Labour's caucus list

 Ko Annette King kua tohua hei tuarua ki te kai-ārahi o Reipa, ki a Andrew Little.

Ka mutu, kua puta ko Kelvin Davis hei makau o te wā i te rārangi hōu o te rōpu.

I kahakina te whakapuakitanga o te rārangi hou o Reipa e ngā pere ahi.

Ae mārika e mea ana te kaiarahi hou na te wera pea o te rārangi i pēra ai, ā, ka whakaae a Nanaia Mahuta, kua kake nei ki te tūranga tuawhā, waihoki, ko Kelvin Davis kua eke ki te pae o mua ki te tūranga tuawaru mai i te tūranga tekau mā waru.

Ko Carmel Sepuloni tērā kua whakaihuwaka mo te iwi moananui a kiwa, mai i te korekore kua ara ia ki te tūranga tuawhitu. Ko Su'a William Sio kua piki mā ngā tūranga e toru ki te nama tekau mā tahi.

Heoi, ahakoa ngā tūranga teitei rā, ka oti i kona, otira e rua ngā mema Māori, e rua anake ngā mema moutere i ngā tūranga tekau mā whitu o te pāti.

Kua heke a Louisa Wall mai i te tūranga tekau mā rua ki te korekore.

Nōreira, e ono o ngā turu Māori e whitu i whakahokia e ngā mema Māori o Reipa ki te pāti - ko te hua? E rua ngā mema Māori ki te kāhui tekau mā whitu o runga.

Tūturu karekau te makau o te waa a Kelvin Davis mo te whakapioi i te waka, engari, kei tere tangi mai pea nga pere whakatupato i ngā kaitautoko Māori a Reipa.