Kua rite Te Mātāwai mō te iwi te kii a te Minita Whakawhanake Māori

Heta Gardiner

Kua tata ki te kotahi tau te pire reo Māori Te Mātāwai e noho tārewa ana engari ināianei, kua rite te minita ki te kawe i a ia ki te iwi.

I ngā wiki tata nei, i tuku te kōmiti whiriwhiri, nā te minita a Te Ururoa Flavell i whakatakoto, i tō rātau rīpoata whakamutunga ki a ia mō te pire reo Māori.  Kua āta wherawhera ia i o rātau whakaaro, aa kua tuku inaianei ki te Kāhui Minita.

I mārō tana whakahoki, i te pātai atu, mena rānei kua rite tēnei pire mō te ture.  “Kua pērā rawa taku whakatau!” hei tāna.

Tuia ki tērā, ahakoa he tini tonu ngā ara me whaia kia whai kiko ia, hei tā te minita, ka whai oranga, i ngā marama kei tua. “Ko te tikanga ia, ka hoki mai i mua i te paunga o tēnei tau.”

He pire tēnei nā Tākuta Pita Sharples i kawe ki te Pāremata i tana rā whakamutunga ki te whare.

Ēngari, i te urunga o Te Ururoa Flavell hei Minita Whakawhanake Māori, nānā nei tētahi komiti whiriwhiri hōu i whakatakoto, ki te āta titiro ki te kiko o te ture.