Kua tīmata ake te Whakataetae Waka Ama o te Ao i Rio

Rahia Timutimu

I te rā nei i tīmata ai te kaupapa nei ki tētahi whakatūheratanga ōkawa e tātaki ai ngā Whakataetae Waka Ama o te Ao. 

Kei te takiwā o te 2000 nei tāngata te tokomaha o te hunga nō ngā tōpito katoa o te ao, kua taetae mai ki te taki-pakanga ki ngā kahika o tēnei hākinakina.

Ā, o taua hunga rā, he 97 ō rātou nō Aotearoa.

Ahakoa ngā whenua rua tekau, neke atu rānei, kei konei, i noho ko Aotearoa te pā whakawairua o te whakatūheratanga nei, te kāhui kaitā tonu o tēnei taiopenga.

Hei tā Manuka Stirling (Te Whānau a Apanui), “Patuki ana te manawa, i te kitenga mai o ngā whenua katoa o te ao kua tae mai.”

I ngā marama e hia kē nei o te whakangungu ka oti nei, kei ngā haora noa iho te tawhititanga e tae ai ēnei kapa ki te moana, me te aha, e rangona ana te rikarikatanga i a rātou.

Ehara i te mea nō Aotearoa mai ngā kaihoe Māori katoa.

Kei Rānana a Tredegar Hall e noho ana, ā, ahakoa kua kotahi tau noa iho ia ki tēnei hākinakina, e hoe ana ia mā tana kāinga rua.

E ai ki a Tredegar Hall, “I whakaaro au kia whakakoikoi aku pūkenga ki tēnei hākina ki Ingarangi, ko tērā te kapa ka hoe waka, nō reira, ka tika te kōrero o taku tuakana, ahakoa kei hea koe e haere ana, kāore koe ka ngaro i tō tikanga me te aroha i te kāinga.”

He whakaharatau kapahaka tā ngā kaihoe o Aotearoa i mahi ai i tēnei rā, ā, i muia katoatia rātou e te huhua.

Ka mutu, ko te tōmina o te ngākau ki tōna whenua tupu te take i uru ai hoki a Hall ki ngā mahi hakahaka.

Hei tā Tredegar, “Taku kitenga tuatahi o te ope o Aotearoa, ka mahana haere taku manawa i te mea, ki Ingarangi kei te maroke haere taku reo, kaore he kanohi Māori i reira, nō reira, āe, he mahana haere taku manawa, ki te rongo i ngā waiata kua maurea mai tātou ki konei.”

Hei te waru karaka i te ata āpōpō tīmata ai te whakataetae nei.