Kua tohua te Tumuaki Māori ā rohe mo Waikato

Kua whiria te Tumuaki Māori a-rohe mo Waikato. Hei te raa nei ka whakanuia e tōna whānau ki runga i te marae o Te Ohaki i Rāhui Pokeka, he tūranga ka kitea hei whakakaha i te mahi tahi, Māori mai, Pirihimana mai, Kaeanatanga mai.

Ko te rāhiritanga o te uri o Te Arawa a Frank Grant ki te rohe o Waikato hei kaiwhakahaere i ngā ara kōkiri mā te Ope Pirihimana e pā ana ki te Iwi Māori. 

E ai ki te kaitakawaenga Māori a Wayne Panapa, i tēnei tohutanga ka noho ko te Māori ki te tēpu whiriwhiri.

E ai ki a Wayne Panapa, “He rangatira kei roto i te ture, i te taha o ngā Pirihimana o te rohe nei, kei reira tonu a Frank ki tērā tepu.”

Hei tā Tukoroirangi Morgan, “Kia kaha tātou te iwi Māori te whakarata me te whakatata atu ki ai a, nā te mea mā te mahi tahi, ka māmā te āhuatanga ki runga kia tātou.”

He tūranga māngai Māori e roa nei te haere ki roto i te Ope Pirihimana, wheoi, kua kite ake te toihau i te hiahia kia whai wāhi te Māori ki ngā mahi whakatau mōna anō.

Ki tā Wayne Panapa, “I ngā wā o mua, ko ngā Māori e kōrero ki te reo pihikete ki a pakeha, kanohi pakeha, engari ko te hiahia o Te Komihana nei, he tūranga mō ngā Māori nei.”

Nā ngā hononga o Grant ki Waikato-Tainui i whakaritea ai te powhiri whakanui. E ai ki a Tukoroirangi Morgan, he huarahi tēnei mo te mahi ngātahi.

Ko Morgan tērā e mea ana, “Kia māmā ngā toimahatanga, kia kite mai ko ngā ara hou hei haukoti i ngā toimahatanga ki ngā whanau katoa i roto i tō tātou rohe. Engari, ko tēnei mahitahi me whai niho, kaua e waiho te mahi ki te ngutu anahe, me whai kiko.”

Ka timata a Grant i tēra wiki ki te riu o Waikato, ko te kōrero ki ngā pouarahi me te whai hua ngā aronga tuatahi.

Hei tā Grant, “Ka whakahuihui ahau i te nuinga o ngā tumuaki, ngā kaiwhakahaere o ērā wāhi, kei te kimi ahau i ngā rautaki pai, kia tāpiri ana ki tēnei rohe.”

Ko Frank Grant te tuatahi o ngā kaiwhakahaere Māori tekau mā rua ka whakatūria ki ngā rohe puta noa i te motu.