Kua tukuna e Flavell te Pire Reo Māori ki te Kāhui Minita

Heta Gardiner

Ko te pire nei te pire Te Mātāwai, kua roa e āta wherawheratia ana e te Minita Whakawhanake Māori a Te Ururoa Flavell, engari mō te hunga e rata ana ki tēnei pire, he wīkena pai kei te haere, nāna te kōrero ki a mātau, kua mutu te rāwekeweke haere i te pire, kua tau ana whakaaro, ā, kua tukuna ki te Kāhui Minita, kei te anga whakamua, kia herea ki te ture. 

Kua 5 tau e tāria ana, ēngari, kua tau te haere.

I puea ake ngā kākano o tēnei pire i te tau 2010 i te whakatakototanga o te Paepae Motuhake.

He kāhui i tohua ki te kimi rautaki, ki te whakarauora i te reo.

I puta tō rātau rīpoata whakamutunga i te Paenga-whāwhā i te tau 2011.

I āta wānangahia e Pita Sharples o rātau whakatau, ā, i te Paenga-whāwhā i te tau 2014, i tīmata tana whakarite i te pire Te Mātāwai.

I te Hongongoi o taua tau, i pānuitia tuatahitia ki roto i te Whare Pāremata.

Kua āta tirohia, kua āta wetewetetia tēnei pire, e te tino o ngā kōmiti whiriwhiri engari i kōrero te minita kia Te Kāea, kua rite ia ki te hūnuku whakamua.

Hei tā Flavell, “Kua mutu kē taku tuku i te pepa ki te hunga o te Kāhui Minita, me te kī, anei tāku, kei te pīrangi nei.”

I whai wāhi te pire nei ki roto i te Pāremata i te rā whakamutunga o Tākuta Pita Sharples, ki te whare.  Nā wai nā wai, ka whakatārewatia e te minita hōu i te pire, kia āta tirohia e tana kōmiti whiriwhiri hōu.

Kua mutu te raweke i te pire, me te whakapono o te minita, ka whai huruhuru ki te Kāhui Minita.

E ai ki a Flavell, “Kua mutu kē taku kōrero ki ētahi aa ki te āhua nei, kei te rata mai rātau ki te aronga nui.”

Ā, hei tāna, kei te tata haere, te pae tawhiti.

Ki tā Flavell, “Ko te tikanga ia, ka hoki mai i mua i te paunga o tēnei tau.”

Kia oti te wherawhera o te Kāhui Minita i te pire, ka tau ia ki ngā ringaringa o te Kōmiti Whāiti Māori.