Kua whakaīngoatia a Maia Wilson hei kōwhiringa mō te Tohu Te Tamahine-a-Papatūānuku

Rahia Timutimu

Whai muri tētahi tau angitū ki te ao hākinakina, kāore he mea tūmeke i te iwi i te whakaīngoa o te kaitākaro nō te kura tuarua o Ōwairaka (Mt Albert Grammar) ki te rārangi īngoa mō te tohu Te Tamahine-a-Papatūānuku ki te Pō Tohu Tākaro Māori i tēnei tau.

Arā noa ngā momo hua papai i āna mahi, kua tū te kaitākaro he tekau mā whitu tau tōna pakeke hei māngai mō Aotearoa ki te poitarawhiti me te poitūkohu, ā, nō nā noa nei ka whakaīngoahia ia ki ngā tautapanga o te Pō Tohu Tākaro Māori.

He tau nui tēnei mō te tauira nō te kura tuarua o Ōwairaka, i whakataha i te poitūkohu kia aro hāngai ai ki te poitarawhiti.  Arā ngā hua kua taka mai mōna, i whakaīngoatia ko ia te kaitākaro rangatahi rawa ki ngā whakamātatautau o te kapa Rarauwhe Hiriwa, i a rātou e whakareri ana mō te Ipu o te Ao i tēnei tau.

Mai reira i eke ia ki te taumata ā-ao, no nakuanei ka haina kirimana ia me te kapa Pulse mō te kotahi tau ki te whakataetae poitarawhiti ANZ.

Koinei te tono tuarua a Maia ki te Pō Tohu Tākaro Māori, ka tū hei te mutunga o tēnei marama.