Kua wikitōria katoa ngā tukinga a ngā Rarauwhe Hiriwa i te tauwhāinga Oceania Tri-Series

Rahia Timutimu

Kua wikitōria katoa ngā tukinga a te kapa Rarauwhe Hiriwa i tā rātou haerenga tuatahi ki Whīti, heoi, i kati ngā hiko i mua rāno i te tukinga whakamutunga o te tauwhāinga Oceania.

He whā tekau mēneti te roa e whanga ana, he raruraru i pā ki te moutere whānui, heoi, tere te whakaatu atu a Aotearoa te take ko rātou tētahi o ngā kapa toa o te ao.

Ahakoa te raruraru hiko, kīhai te kapa Rarauwhe Hiriwa i noho i te pō, wawe ana tā rātou tīmata ki te kapa Whīti.

He whiringa hōu anō i kōwhiria e te kaiako a Waimarama Taumaunu i te rohe kuru, arā, ko Ellen Halpenny rāua ko Bailey Mes.

Ā, he tuaruatanga tēnei mā Phoenix Karaka i te aro ā kapa o Aotearoa, i tākaro tahi ia ki te rohe ārai rāua ko Leana de Bruin, i tākaro a ia i tana tukinga iwa tekau mā Aotearoa.

He kuru hāmene i tutuki i a Halpenny i te tangi o te whio, kia ārahi he rua tekau mā tahi ki te tekau i te hauwhā tuatahi.

I whānui ake te āputa ki waenga i ngā kapa i te wehenga rua, he whā tekau mā tahi ki te tekau mā whitu.

Ka kawea tonu e te kapa Rarauhe Hiriwa tērā mauri toa ki te haurua tuarua engari e tika ana me hari a Whīti i tā rātou taumata tākaro, i pai ake i te tukinga tuatahi ki a Aotearoa i te Rāmere.

Heoi anō ko ngā Rarauwhe Hiriwa tērā i kapo ake i te wikitōria, e whitu tekau mā ono ki te toru tekau mā whā te kaute whakamutunga.