Mā ngā whakatau tika mō te hauora ka ārai i te mate manawa

Ko te mate manawa tonu te tino mate i Aotearoa nei, ka mutu, ko te nuinga o ngā mate, he matenga tōmua i āheia te karo atu.

I toro atu a Te Kāea ki a Mona Mahu, he wahine kua pāngia e te mate nei, otirā he wahine e whakapau kaha ana ki te whakaako i ngā whānau ki ngā āhuatanga o te ora, i runga anō i te tūmanako, ka kore āna tamariki mokopuna e pākia e te mate nei.

He mamae e titi ana ki te ngākau, nā reira, kua tohua e ia ko te wiki whakatūpato i te mate manawa nei, hei whakaatu atu i tāna hīkoi ki te ao.

Iaianei, he neke i te rua tekau mā rima tau nō te matenga o tōnā māma rātou ko tōnā pāpa, ko tōnā hoa rangatira hoki i mate katoa i te mate manawa.

Ko Ted Marsh te hoa o Mona Mahu, ā, i whakarerekē i tōnā āhua kai, whai muri i te hāparaparatanga ki tōna manawa, he ono tau ki muri.

He orite ngā whakaaro o Marsh rāua ko Mahu, arā, kia whakatairanga ake i te noho me te kai ora iāianei.

I roto i te iwa tekau mīniti ka mate tētahi i te mate manawa, ā, i roto i te tau kotahi he koni i te ono mano rima rau tāngata ka mate i te mate manawa.

Nā whai anō o ngā matenga katoa i Aotearoa nei, he toru tekau ōrau o ēna matenga nā te mate manawa tonu.

Te nuinga o ēnei mate, i mate moata, ā, i āhei te kaupare. Ko te whakahau ki te iwi, kia matāra i te mate nei.