Mā te BMX a Jesse Smith e kite nei i te ao.

James Perry

E ai ki te kōrero mā te huruhuru ka rere te manu. Mō Jesse Smith mā tōna pahikara noa ia e rere.

Kua 13 tau a Smith e eke pahikara BMX ana. Kua 8 ōna taitara ā motu, e 5 ngā wikitōria ā ao. Hei tā te uri o Ngāti Kahungunu me Ngāpuhi, kāore e ko atu i kō mai i te BMX.

Kua whai wāhi te tauira o te kura o Tihipuke ki ngā Taumāhekeheke Rangatahi ka tū ki Āketina hei te tau nei. He kokenga ki tōna tino moemoea.

Ko Āketina tētahi whenua hou mōna. I roto i ngā tau kua whakataetae ia ki whenua pēnei i a Āmerika, ko Ahitereiria, ko Koromōpia, ko Atepaihānia anō hoki.

E whā tau noa tōna pakeke ka eke tuatahi ai i ngā pahikara BMX i Tūranga nui a Kiwa. He kaieke pahikara katoa ōna tuakana, tūngane, heoi kua aro rātou ki mea kē atu. E tautoko tonu ana rātou i a ōna moemoea. I hūnuku rātou i Te Tai Rāwhiti ki Waikato whanake ai ia i ōna pūkenga BMX, e whai wāhi hoki ia ki ngā Taumāhekeheke o te Ao.

Nōnā e noho nei ki Kirikiriroa kua piripoho te uri o Ngāti Kahungunu ki te Wairoa ki tōna ihopūmanawa, kia Sarah Walker, te kaiwhiwhi mētara kōura Orimipia. Inā hoki te taunaki a Walker i ā Smith, ā akoranga, ā pūtea tonu.

Ka whakataetae a Smith ki ngā Taumāhekeheke rangatahi ki te taha o Cailen Calkin, ka mutu ka whakataetae hoki a Smith i ētahi whakataetae whakauru ki ngā Taumāhekeheke matua ki Tokyo, 2020.

Hei tā Walker, ka taiohi tonu a Smith i taua wā, heoi e whakapeto ngoi tonu ana rāua kia whakapono pū ai a Smith ko ia te kaieke tere rawa o Aotearoa.

Ki ērā whakataetae whakauru ka whakataetae a Smith ki a Walker. He whakatinanatanga anō i tētahi moemoea. Hei tā Walker, ahakoa kāore ia e hiahia kia hinga i tōna tauira, e kipakipa tonu ana ki tā Smith pitomata. Hei tāna anō, i ētahi rangi whakangungu ka noho whata a Smith. Ki te kore, kua pau katoa te hau o Walker e eke panuku tonu ai ia.

Kāore e kaore ka rere tonu a Jessie Smith me tana pahikara ki ngā tōpito o te ao, ā haere ake nei.