Māori still worst off in Salvation Army report

E ai ki te rīpoata hou a Te Ope Whakaora, kei raro tonu te iwi Māori e putu ana. Ka whakarewaina te pūrongo Moving Targets rua mano tekau mā ono i te rā nei. Ko ētehi o ngā māharahara nui, mō te hunga tamariki me te tokomaha tonu o ngā mauhere Māori. Ko Te Pōharatanga Tamariki tētehi o ngā mānukanuka nui ki roto i te Rīpoata hou a Te Ope Whareora.

“He āwangawanga tonu mō ngā tamariki, kei waenganui o te rawekoretanga me te noho kainga kore,” Reina Harris, te Māngai Māori, Te Ope Whakaora.

Hei tā te rīpoata, āhatia te tupu haere o te ohanga i Aotearoa, kōatu i te tekau mā rua ōrau i ngā tau e rima kua hipa, e noho pōhara tonu ana ngā tamariki.

Ko tētehi anō take, he whakarau whitu te maha o te hunga mauhere Māori ki tā ngā mauhere tauiwi.  Koianei te tokomaha ake, mā te rua ira whitu ōrau, i te tau noa nei.

E ai ki a Harris, “He āwangawanga nui tonu te mauheretanga o ngā tangata Māori, me te tāruatanga o te hara.  He nui te pūtea o tērā tari o te kāwantanga, engari he iti te hua.”

Otia, i tapaina te ingoa o te rīpoata hou ko "Moving Targets" i te kaha rerekē o ngā tatauranga e tukuna atu ana e ia tari kāwana

“Te kaupapa o tēnei pūrongo, nā te huri haere o ngā whainga o te kāwanatanga, o ngā tari o te kāwantanga,” hei tā Harris.

Ko te whakautu a te Minita mō ngā take Pūtea a Bill English ki te ripoata nei, "E whakaae ana rātou kia mātaitia ngā mahi arotake whanaketanga, engari, ko ngā korero e mea ana, he hangarau ngā tatauranga e puta ana i ngā tari kāwanatanga, kei te hē."

Ko tētehi o ngā tohutohu, me whakatū te kāwanatanga i tētahi rōpū tiaki i ngā tamariki.