Matiu Dickson

He parihau nō Tauranga Moana e takahi atu ana i te ara whānui a Tāne ki Paepae Aotea, ki Te Reinga, koia Ko Matiu Dickson o Ngaiterangi, o Te Whakatohea. I hinga ohorere a Dickson i atatū nei, i te whakatūwheratanga mai o tētahi whare hōu i Te Whare Wānanga o Waikato.

He pukenga matua i kawea ake ngā kaupapa Māori i roto i te ahurea o te ture. A, e tangi apakura ana ōnā hoa mahi.

Hei tā Te Kahautu Maxwell nō Te Whakatōhea, "Kauria atu ra te moana, i hoea mai e ou tipuna, kei te pohara Te Whare Wananga otira te ao Māori i to ngarotanga i tēnei wā, no reira e te rangaitira e haere."

E ai ki ngā korero i tae mai ki Te Kāea, i tū mai a Dickson ki te tuku i tana whai korero. Mutu rawa iho, koia hoki āna kupu whakamutunga a tīnana nei i tēnei ao kikokiko.

Hei tā Pou Temara, ahakoa kua uhia ko te kapua pouri ki runga i Te Whare Wānanga, he tohu rangatira pea tēnei mō te Kākā Tarahae.

“Nona te whare ra, ara he kaimahi hoki ia i reira ra, roa aia e noho ana i reira i roto i tera wahi ra, ae he mea tera hei whakaarotanga hei miharotanga hoki, ma te whakaaro Maori, koia tonu te utu ko tona whare.”

Ko Dickson te Heamana o Te Rūnānga o Kirikiriroa, he mema hoki o te Kaunihera o Te Whare Wānanga o Awanuiarangi. Apiti atu, he kaikaunihera o mua mo Tauranga Moana, he kairaranga hoki o Te Whakataunga Tiriti o tōnā iwi o Ngai Te Rangi.

“Kei te ohorere, kei te tumeke matou kei te apakura moteatea Te Whare Wananga o Waikato, i te ngaronga o tenei matanga kapa haka, tenei matanga tikanga Maori, tenei tohunga o te ture,” hei tā Maxwell.

Kua waiho i te pūkenga matua nei tōnā hoa rangatira a Helen, rātou ko a rāua tamariki tokoono me a raua mokopuna tokowhā. Ka tangihia rā te taonga o mate ki te Marae o Hungahungatoroa ki Matapihi, i Tauranga.