Me huri mai i te 'au-au', ki 'Tēnei Au, tīhei Kahungunu'

Te Kuru o te Marama Dewes

E āki ana te heamana o Ngāti Kahungunu a Ngahiwi Tomoana, kia whakanuia e ngā kēnge o te rohe tō rātau tuakiri Māori, otirā kia ako i te reo me ngā tikanga. E whai ana tēnei i te huihuinga a te Māpū Manguru i tutu ai te pūehu i runga ake i te maunga o Te Mata o Rongokako i Heretaunga. He wāhi tapu, e ai ki a Tomoana.

Whakarērea te karanga o te kēnge, whakamanahia te karanga o te ao tawhito, koia tā Ngahiwi Tomoana.

“Mehemea e kōrero rātau 'tēnei au, tīhei Kahungunu' tika tonu engari he mea tino tauhou, he mea takahi i tō mātau mana e auaua ana hoki i runga i tō tātau maunga tapu maunga tipuna”, tā Tomoana.

Ko te ingoa tika, ko Te Mata o Rongokako, ka mutu ko Rongokako te tipuna koroua o Kahungunu i puta ai a Ngāti Kahungunu.

“Kei te mōhio au te nuinga o rātau whakapapa ki a Rongokako, engari tika tonu, haere rātau ki reira, engari he mahi korori rātau kia mahi tō rātau mahi auau, me te SFH, kia tūkino tō tātau tipuna”, te kī a Tomoana.
 

Ka whai tēnei i te hui a te kēnge hui ki Te Mata o Rongokako, me ngā kōrero mataku a ētahi mema o te hapori tūmatanui, āpiti atu tā ngā Porihimana aukati i te huarahi ki te tihi.

“Ko taku tino hiahia ki kōrero ake ki a rātau ngā Māngarū, kia whakamārama ki a rātau te tino tapu o tērā wāhi ki a mātau, me huri ō rātau whakaaro mai 'auau' ki tēnei au”, te kī a Tomoana.

Hei tā Tomoana ka whai hua te kēnge i te ako i o rātau whakapapa ā-iwi.

“Engari e hiahia ana tēnei iwi kia kōrero ake ki a rātau kia mōhio tō tātau reo kia whakaako tō tātau reo me ō tātau tikanga, e pā ana ki a Rongokako, e pā ana ki tō rātau ake whakapapa me ngā hononga o tētahi ki tētahi”, te kī a Tomoana.

Kua hui tahi te kēnge me te kaunihera o Heretaunga rātau ko te taratī o Te Mata, kia whakatau i tētahi mahere whakahaere, haere ake nei.