Me utu ngā pirihimana i tō rātou hara te kii a tētahi whānau

Ko tā te whānau o tētahi kōtiro, tekau ōna tau, i mapua ki te rehu-horopito e ngā pirihimana i Whakatāne i te Rāmere, me utu aua pirihimana i tō rātou hara.  Kua tuku whakapāha ngā pirihimana, heoi e whakapono ana te whānau kāore anō te take nei kia ea. 

He whānau tēnei kua rongo i te kino na ngā whakatumatuma i tau ki runga i to rāua tamahine a Amy.  Nā ngā pirihimana ia i aituā konehu i a ia.

I whakatū ngā pirihimana i a Blue me tōna whānau, kāre i tawhiti mai to rāua kainga i te Rāmere ka huri.  Ko tā te whānau, i whai ngā pirihimana i a rātou nā runga i ngā whakapono a Blue ki tōna tino rangatiratanga.

I roto i tētahi whakatau a ngā pirihimana i tuku kupu aroha te heihana a rohe o Te Moana nui a Toi a Andy McGregor.

Engari i āta kōrero mai ia mei kore ake ngā whakatumeke o Blue e kore rawa ngā pirihimana e aro ki te whakamahi i te rehu horopito hei tiaki i a rātou.  Ko tā te whānau e hiahia kia tuku kupu aroha ngā pirihimana i uru ki roto i tēnei raru.

He hāmene kua tau ki runga i a Blue ināianei whai muri i tēnei raru ka tū ia ki roto i te kōti a rohe o Whakatāne hei tēnei Rāapa.