Me whai rautaki te kāwanatanga ki te kaupare i ngā tukunga haukino

He tohu kua hē ngā rā o te kāwanatanga, koinei te whakatau a te māngai take taiao o Reipa, a Nanaia Mahuta i te whakapuakitanga mai o ngā hua rangahau mō te huringa o te āhuarangi a te Manatū Taiao e matapae ana, ka kino ake ngā tukunga haukino mā te rima tekau ōrau hei te tau rua mano rua tekau mā rima.

E whai ana ngā hua rangahau nei i tā te kāwanatanga i oati ai, ka whakahekea kē ngā tukunga mā te rima ōrau i mua i te ekenga ki taua tau.

Kei te tūranga rua tekau mā rua o te ao a Aotearoa mō te nui o ōna tukunga waro, ahakoa rā te pai o tēnei tūnga, kāhore i te pai ngā tohu ka noho tātou ki tēnei taumata.

Ki te aroaro o ngā minita hou i ngā take taiao inanahi, whāriki ai ngā matapae e mea ana hei te tau rua mano rua tekau mā rima ka piki ngā tukunga waro a Aotearoa mā te rima tekau ōrau i ō ērā o te tau tahi mahi iwa rau iwa tekau. 

Kāhore te iwi o te kāinga nā rātou te pakanga ki ngā mahi wiri hinu i te papa moana i te ohorere ki ngā matapae, me tā rātou kī ake, ā te kāwanatanga mahi me ā te kāwanatanga matapae, e rua e rua.

Kotahi tonu te rerenga whakautu ā tuhi nei i whakahokia mai ki a Te Kāea e te minita whai pānga, a Tim Groser i te rangi nei. Nāna te kī kei te ara tika te kāwanatanga e haere ana ki te kaupare i ngā matapae e kōrerotia nei.