Minita Take Kāwanatanga ā Rohe - “me titiro au ki te ture ki te whakatikatika i tēnei tū āhuatanga”

breaking Heta Gardiner

E mea ana te Minita Take Kāwanatanga ā Rohe, a Nanaia Mahuta, ko te tatau pōti anō i muri i te ekenga ōkawa o te mema ki te kaunihera, he "āwangawanga". 

Ka whai tēnei i te whakahokinga atu o Alison Silcock hei kaikaunihera mō te rohe pōti o Galatea-Murupara i te putanga o ngā pōti i tatauria anō, nā te pōti kotahi i puta whakamua atu ai ia i te kaipāho ōmua, i a Hinerangi Goodman. 

I te putanga tuatahi o ngā tatauranga pōti, i ōrite rāua i runga i te 262 ngā pōti. I raro i te ture, he ingoa ka huhuti ake i te pōtae hei tohu i te toa, ā i puta te ingoa o Goodman. I taua rā tonu, ka whakaoatitia ia hei kaikaunihera o Galatea-Murupara. Heoi, inanahi rā i tatauria anō ngā pōti i raro i te maru o te Kaiwhakawā ā Rohe, ā nā te pōti kotahi i hinga ai a Goodman, ka riro kē te tūru i a Silcock.

Ko tā te Minita ki Te Ao “He whakaaro anō tāku, ka mutu te coin toss, ka mutu te putanga o te tangata tika, kia haere tōtika ki te kawe i ngā mahi i runga i tērā tūranga. Ko te āwangawanga i puta mai i tēnei wā, ka whiwhi te coin toss i te kaitoa, engari ko te tangata kāore i tāea, kua wero atu ki te kaute anō i te kaute. Koinā te āwangawanga ināianei. Nō reira me aro au, me titiro au ki te ture kia whakatikatika i tēnei tū āhuatanga”. 

E mārama ana a Te Ao, kei te whakaaroaro a Goodman ki te whai i te ture. He nui ngā Māori i te hapori o Goodman e mānukanuka ana i te pūnaha i oti atu ai i tōna hinganga.

Ko te whānuitanga atu, kei Te Ao, hei te 6:30pm i Whakaata Māori.