Nā te tautoko a ngā mema Māori kua whai hua a Andrew Little

Kua puta kaha mai te kāhui Māori o te Rōpū Reipa ao ake i te kōwhiringa o tētahi kai-ārahi hōu mō te pāti.

Ko Andrew Little tērā i whakaihuwaka i ana hoa whakataetae, i a Nanaia Mahuta me David Parker, ka mutu, he kotahi ira whā ōrau te wehenga i waenga i a ia me te tuarua me Grant Robertson.

Ae mārika, ahakoa i tautokotia a Nanaia Mahuta e tana kāhui Māori i te rauna tuatahi o ngā pōti, te āhua nei ko tā ratou rautaki tērā i kitea i te rauna tuarua, tuatoru hoki, ara, i whakawhitia tēna tautoko ki a Andrew Little.

Ā e mōhiotia ana i te ao tōrangapū ka whai hua te piri pono o tētahi ki tētahi.

E mōhio ana te kaiarahi hou a Andrew Little kei te noho nama ia ki te ropu Māori o Reipa me a rātou mema, ā, te āhua nei ka whakatinanatia tēnā i te pae o mua.

I te rauna tuatahi o ngā pōti, i puta mārika ki mua ko Grant Robertson. Heoi, i te rauna tuarua i whakawhitia te tautoko mo Nanaia Mahuta ki a Andrew Little kia noho ko ia ki mua.

I te rauna whakamutunga i hauruatia te tautoko o David Parker, ka wikitoria ai ko Little mā te kotahi ira whā ōrau.

E mōhiotia ana e rapu hua ana te rōpu Māori o Reipa ao ake i tana whakahokitanga mai i te tautoko a Ngāi Māori ki te pāti.

Ko te aro inaianei ki te tūranga kaiārahi  tuarua, ā, karekau a Nanaia Mahuta mo te pare i te tūranga ki te tukuna ki a ia.

Nōreira, ahakoa i hinga a Nanaia Mahuta, tūturu i wikitōria ko tana rōpu Māori - ara i whai reo i te whakataetae, ā, inaianei kua whai hoa i te kaiārahi.