Native Affairs - Te Mahi whakapou pūtea

I ngā tau rua tekau kau pahure, he kotahi piriona tāra te nui o te pūtea kua tohaina e te Kāwanatanga mo te Kōhanga Reo.

Mo ngā wiki e whitu kua āta whakatewhatewhahia e Native Affairs ētahi whakapae e pā ana ki te mahi whakapou pūtea a ētahi o ngā kaiwhakahāere o te Poari Matua.

Mo aua wiki e whitu kua huri tuara te Poari Matua ki ā mātou patai e pā ana ki ngā mahi whakahaere pūtea taunaki mo ngā mokopuna o te Kōhanga Reo.

Tāpiri ki tā rātou huri tuara ki te whakahoki kōrero, i tuku tono te poari ki te Kōti Matua hei aukati i te whakapāohotanga o tā mātou pūrongo.  

I te Wenerei i tangohia e te Poari tā rātou tono ki te Kōti, heoi na tā rātou aronga pērā i puta te whakahau a te kaiwhakawā kia whakaaria e ngā apiha o te Poari a rātou oati ā pukapuka ki te Kōti.

I whakaritea e Native Affairs ki te whai i tēnei pūrongo nā te mea ko taua rōpu tētahi o ngā mana tino nui mo te whakamana i te reo me ōna tikanga mo ngā mokopuna Māori o te motu.

I tēra marama i whakapaōhohia e Native Affairs tētahi pūrongo e whakaatu atu ana ki te marea i te tekau ma toru miriona tāra i roto i te pēke o te Poari Matua i ā ngā Kōhanga o te motu e noho taumaha ana, heoi i te tukuna kētia e te Poari he pūtea tārewa ki ōna kaimahi me ōna kaiwhakahāere.

He pūrongo tēnei e āta tiro atu ana ki te mahi whakapou pūtea a tētahi tokorua kei runga noa atu i te Poari Matua a e whakahaere ana i te pakihi kei raro i te maru o te Kōhanga Reo, ara ko Te Pataka Ohanga.

Kō Kahurangi Iritana Tawhiwhirangi raua ko tana hinaonga ko Lynda Tawhiwhirangi tēra.

He ripoata e whakaatu atu ana ki te marea he mohiotanga i te nuinga o te wā ka noho noaiho ki wāenganui i ngā rangatira e whakahaere ana i te kaupapa nei.