Ngā Maramara o Taniwharau return to the Tainui regionals

Ko ētahi o ngā mema ō-mua o te kapa whakaihuwaka o ngā whakataetae ā-motu i te tau waru tekau ma tahi, arā o te kapahaka o Taniwharau ka eke ngātahi me te kapa o Ngā Maramara o Taniwharau ki te whakataetae a rohe o Tainui waka ka tū āpōpō. 

He tū nui āpōpō mā ngā uri me ngā mema tuatahi o te kapahaka o Taniwharau , e whakanui ana i tā rātou tau toru tekau mā rima.

Hei tā Haereata Poutapu o te kapa Ngā Maramara o Taniwharau, “He maumahara ki ngā mema o ngā rōpū kua huri ki tua o te ārai.  Kia a rātou ngā kaumātua i whakahangangia tēnei rōpū, ā ki tō tātou nei Arikinui a Te Atairangi Kaahu tērā wā, e whakakaha nei ki te kohikohi tana iwi i roto i tēnei rōpū.”

He whakamihi anō hoki ki tētehi o ngā pou o te rōpū, ara te tuahine o te Kīngi Māori, a Tomairangi Paki.

“Ko te kaha mō te rōpū nei, mō te honotanga, koirā te mea nui i tērā wā,” hei tā Poutapu.

Nō te tau kotahi mano iwa rau waru tekau mā tahi, ko te kapa o Taniwharau te toawhakaihuwaka tuatahi o te whakataetae poronihia o Aotearoa i tū i Tāmaki Makaurau.  E manako ana Ngā Maramara o Taniwharau, ka whērā hoki ngā kapa toa o tēnei wā.

E ai ki tetahi kaihaka o Ngā Maramara o Taniwharau a Huirama Matatahi, “Ko te whakahoki mai , ko te poipoi, ko te akiaki i ngā tīma matua o tēnei rā, ki te kī, ae, i kōnā mātou i tērā atu rau tau, ā, kua tae mai ki tēnei rau tau, e āhei ana tātou te uru ki ērā āhuatanga.”

Kotahi te kapa tauhou a Te Kāheru Matarau a Hauā, e whai ana i te mana kia tū hei kanohi mō Tainui waka ā tērā tau ki Te Matatini i Heretaunga.

Hei tā te Kaiarataki o Te Kāheru Matarau a Hauā a Adam Whauwhau, “Kua roa tā mātou rōpū ki Te Iti o Hauā e haere ana, e tautoko ana i ēnei whakataetae, kua tae mai ki te wā, kia karangahia ngā hapū katoa o roto i a Ngāti Hauā kia tū ki roto i te kapa kotahi.”

Tōna ono RAU, e waru tekau ngā kaihaka ka eke ki te mura o te ahi ki konei āpōpō, ki mua i ō rātou whānau, kaitaunaki hoki e whakapaetia ana, he rima mano te rahi. 

Ā, tērā pea ka kitea a Kīngi Tuheitia i te taha o tana kapa o mua, o Ngā Maramara o Taniwharau.