Ngā taumahatanga o te noho tiriti ki te taone o Tāmaki Makaurau

Ao ake i te rīpoata a te rōpū Homelessness Steering Group e tohu ana, kua pūrua te tokomaha o te hunga kāingakore ki Tāmaki Makaurau, i tūtaki atu a Te Kāea ki tētahi tāne e noho pēnei ana mō ngā tau maha.

Ki roto i te hoihoi me te korikori o te tāone nui, ka tū te wā mō tētahi tāne.

Hei tā Alan Hamilton nō Ngāpuhi, "Me pēnei te kōrero, ka huri haere te ao ki kō engari noho tonu koe i tō kotahi."

Koinei te kāinga o Alan Hamilton mō ngā tau tekau mā waru, hei tāna, he maha ngā āhuatanga e kore e kītea, e kore aro rānei, "Kāhore ngā tāngata i te kite i ngā pūtupurangi, kāhore hoki rātou i te mohio he aha ngā mahi ki konei, he tāmariki tekau mā rua, tekau mā toru tau e nohia ana ki ngā pāka."

He mea uaua tonu mā tēnei uri o Ngāpuhi kia moe ki ngā tiriti, he uauatanga kua pākinotia ki ngā rangatahi me ngā pakeke.  Hei tā Alan anō, "Ka rapu au i ētahi mea engari ko te nuinga ka tiakina mō ngā tāmariki kia whāngai i a rātou, ko ngā kongakonga noa iho e toe ana māku."

I whakaatu atu a Alan ngā wāhi o Victoria Park e whakamahia ana e ngā tāngata kāinga-kore, "Kāhore tētahi i te tiaki i a rātou, ka oma atu i ō rātou kāinga, i ngā taumahatanga o a rātou wāhi kia nohia ki ngā tiriti, engari he wāhi mōrearea tēnei.  E rua tau tēnei tangata e noho ana ki tēnei pāka, ā, koinei te wāhi e waiho a mātou peke me ngā paraikete."  Ahakoa ōna taumahatanga, e mau tonu i a Alan ngā manako, "He arapoka, he raiti iti hoki engari ko te mea taumaha ko te hikoi i taua ara, he ara roa tērā.”