Ngā Taumāhekeheke Invictus - Pūrongo Motuhake

Ahatia kei te hāere ngā taumāhekeheke hoawhenua ki Glasgow, e hia rau nei ngā tāngata e whakarite ana mō tētahi atu tauwhainga, ara, ngā taumāhekeheke Invictus. 

He tauwhainga mā ngā hoia rānei kua kaiākiko, kua whara, kua pāngia e te māuiui hoki.

Hei ngā wiki e ono e hāere ake nei, ka tau atu ēnei tāngata tekau mā rua ki te tauwhainga Invictus, he whakarauikatanga I ngā tāngata whā rau neke atu, nō ngā whenua tekau mā whā o te ao. 

Heoi, kua tae mai rātou mai i ngā tōpito o te motu ki Burnham Military Camp mō te wiki whakangungu.

Ki a Dion Taka, he merekara te kite i aia e hīkoi ana i tēnei wā, he āhuatanga kāhore i āta whakaaroahia ake e ia i ngā tau e rua ki muri. 

Hei tā Dion Taka, “I've spilt blood for this country on foreign soil, so much so that I almost never came back.”

I te tuawhā o Here Turi Kōka i te tau rua mano mā rua, i rere ngā matā o te hoariri ki Afghanistan i te pakanga ki Baghak.

A mea rawa ake i hinga ngā hoia tokorua nō Aotearoa, i pūhia a Taka, e tētahi matā tūkino rawa atu.

Kei te mātūtū tonu aia, ā, ko ngā keemu e kainamu mai ana he whainga, he aronga mōna, hei whakangāwari i ngā mamae e ngau kino tonu nei. 

Mārakerake te kitea he wairua whakataetae kei tēnei rōpū, metemea anō, mā te whakapakari tinana e ora ai ō rātou wairua.

Ko Prince Harry tēra e whakarite ana i te kaupapa Invictus, he huarahi kia whai oranga ngā tāngata nō Te Ope Kātua, he waahi hoki hei whakanui i ngā whakatutukinga, ahatia te āhuaranga o te wharanga ki te tangata.