Ngā whakataetae Manu Kōrero o Tainui Waka

Rahia Timutimu

I ngā rangi okioki kua taha ake nei, i tū te whakataetae Manu Kōrero o Tainui Waka ki te Wānanga o Waikato.

Mai i te tau 2010 kua riro i a Waikato te tūranga toa i te wāhanga o Pei Te Hurinui.

I hoki mai te toa o tērā tau a Kaharau Keogh ki ngā whakataetae nei, me kore e riro anō i a ia te taitara nui.  

Tekau mā toru ngā kura nō ngā moka o Waikato i uru mai ki te whakataetae kia kite ai ko wai ka koke whakamua ki te whakataetae ā motu.

I tū a Hoera Kereama hei māngai mō tōna kura a Te Rau Aroha. I wikitōria ia i te tau 2011 i Tauranga Moana.

I tēnei wā kua whai tūranga ia hei kaiako i te kura rā, ā, ko ia kei te ārahi i ō rātau kaikōrero. 

I rangona ngā kaikōrero reo Māori, reo Pākeha hoki i roto i te hōro, hēoi, i waho kē a Kaharau Keogh e takatū ana i a ia anō. 

I whāki ia ki Te Kāea, ahakoa koa rima tau ia e whai ana i ngā whakataetae Manu Kōrero nei, i anipā tonu te ngākau, kei kore ia e mahara i āna kupu. 

Ko tana kaupapa kōrero, ko "Should Te Reo Māori be a part of the sggregate in Te Matatini?"

"Kāore au i te whakaae. Ka whakapuakihia e au ōku whakaaro i te rangi nei" koinā tana urupare ki tā mātau kairipoata. 

I puta anō tōna ihu i tēnei tau. Ka haere ia ki ngā whakataetae ā motu ka tū ki Waikato.