Nurturing career pathways for te reo Māori students

He whakaatu ki ngā taiohi reo Māori ngā huarahi e taea ana ki a rātou āmuri i te kura tētahi wāhanga motuhake e whāngaihia ana i te wānanga Māori 4 Taiohi. E ai ki tētahi kaiako ko te poipoi i ngā uri whakaheke ki tā rātou e ngākau nui ana me te pupuru ki nga taonga Maori he mea hāpai i ngā iwi mo ngā rangi kei te heke mai.

Kotahi wiki ēnei tauira kura tuarua e rima tekau e noho ngātahi ana ki Te Kura o Te Kōtuku i Tāmaki Makaurau. E ai ki tētahi o ngā kaiwhakahaere o te wānanga reo o Māori 4 Taiohi, ki a Wiremu Mato, ko te whakaatu i ngā huarahi mahi e taea ai ngā tauira reo Māori te whai āmuri i te kura tētahi o ngā aronga.

“Inanahi i haere mai ētahi tangata nō Careers NZ. Ko tō mātou nei mā rātou te kite atu i ētahi momo mahi e hāngai pū ana ki te reo Māori.”

I te rangi nei i whai haere ngā tamariki ki ngā mahi toi whakaari, he kaupapa ngākaunui nā ēnei tauira mahi kapa haka. E manako ana te wānanga he akoranga hoki ēnei ka whakamahi ia rā ia rā.

E ai ki tētahi Kaiāwhina a Tiana King, “Kia ako i ēnei tūmomo taonga heoi kia hanga i o rātou ake nekehanga, kia whakapakiri i a rātou wairua. Kia maia te tū i roto i o rātou mahi, kia kaua e whakamā. Whakaatu! Whakaatu i o mahi ki te ao whānui.”

Kō tā Tiana King, he ao uaua kei tua i te kura mō te tamaiti Māori. E mea ana ia mā te wānanga nei e ako ai ngā tauira ki te tiro whatumanuao, me te tū poho kererū.

“Ki ōku nei whakaaro he tino uaua mō te tamaiti Māori kia wehe i te kura, katahi aue! Kei konei te ao Pākeha! Me he tino uaua mō ētahi ki te whai hua i tēnei ao,” hei tā King.

“Tēna pea kāore wēnei o ngā taiohi e mōhio ana mahi he tūranga e pā ana ki tēnei me te reo Māori,” hei tā Mato.

Hei tēnei Rāmere mutu ai te wānanga nei.