P Drug taking over Marijuana industry

Ko te whānui noa ake o te waranga ki te taimiri P te take e māmā ake ana te hoko. Koia tā Shane White, kaiwhakahaere o te kaupapa Patua Te Ngāngara, i te putanga mai o te rangahau ā-tau a Te Kūnenga ki Pūrehuroa, me kotahi haora, iti iho rānei te roa, e taea ai te hoko P i Ōtautahi me Tāmaki Makaurau.

Kua tekau mā rua tau a Shane White e āwhina ana i te hunga e kai ana i te tamiri P kia mutu, me te tautoko hoki i ō rātou whānau.  Kāore ia i te paku ohorere ki te rangahau Illicit Drugs Monitoring Sytems (IDMS) i puta e mea ana he ngāwari noa te hoko i te tarukino nei i Otautahi me Tāmaki Makaurau.

E ai ki te Kaiwhakahaere o Patua Te Ngangara a Shane White, “Ko Tāmaki te wāhi tuatahi hei hanga i ēnei kai kino, kātahi ka hiki o roto o Otautahi, i te mea, i rauhi mai te nuinga, ngā kaihanga whare, ērā mea i reira.  Nō reira, ko ngā āhuatanga āwhina te hunga kua raru i te tarukino, kua wetewetehia, i runga anō i te rūaumoko, kātahi ka tae mai i ngā mea hou tāwāhi me te maha hoki o ngā pūtea i reira.”

Ko tā ngā pirihimana anō, kua piki ake te kai i te tamiri P i Aotearoa, i te ao whānui hoki.  Hei tā Shane, koirā te tarukino e kaha hiahiatia.

Hei tā White, “Māma ake te hanga P, i te whakatupu tarukino.  Pai kē atu te utu mō te hoko, inā hoki te nui o te pūtea. I te rā kirihimete, ngā rā whakangā, rongorongo tonu mātou ēnei kōrero, kua kore ngā tarukino e tupu nei i te wao. Nā te huri aro ki te methamphetemine, otirā, ēnei tarukino hou kua hangaia ko synth.”

E kī ana te rangahau, kua kaha ake te hoko a te hunga kai taimiri P ki te whitu tekau ōrau mā te pae papori pāpāho me ngā whārangi ipurangi whakahuna.

Hei tā te tari pirihimana, kua roa te wā mātou e aro ana ki ngā whārangi ipurangi Dark nets e kōrerotia ana i roto i te rangahau.  Hei tā rātou anō, koirā te wāhi e hokongia ana e te marea te taimiri P. 

E aronui ana ngā mahi a te tari pirihimana ki te whakakore i ngā momo whārangi ipurangi whakahuna nei.