Piripi argues Te Mātawai representation more than fluency

E rau rangatira huri noa, tēnā koutou katoa. Ehara ko te mātau ki te reo Māori te paearu matua e whai waahi ai ngā mema hou ki te Mātāwai. Koira te whakahau a te Tahuhu Rangapū ō-mua o Te Taura Whiri a Haami Piripi mō te rōpū kei te whakatūria hei kōkiri i te rautaki reo Māori.

Hei tā Haami Piripi, ehara hoki i te mea me tohu ake ko ngā pūkorero hei mema mō te Mātāwai, engari hei tāna, me tohu kē ko ērā kua kawe i ngā kaupapa reo Māori, whai hua.

“Kia mōhio tonu pea tēnā tangata ki te ahuatanga o te reo, kia whai ngākau nui hoki kia ora ake te reo.”

Ko te kaiarahi mō te hunga noho taone a Willie Jackson, te whiringa tuatahi ki Te Mātāwai, nānā hoki te haepapa ki te whakarauora i te reo Māori. Hei tā Piripi, he whiriwhiringa pai tērā, tā te mea, kua ngana a Jackson ki te ako i te reo Māori.

“Nānā anō i whai atu i te reo hei reo kōrero anō mānā. Kua kite au i a ia e whakaako ana i te reo me ōnā tikanga, nānā anō i tautoko ake i ngā teihana Māori, kia puawai mai ki te motu puta noa.”

Mā ngā iwi e whakatū ngā mema e whitu, o ngā mema 13 katoa ki Te Mātāwai. Nā whai anō, ka whiriwhirihia ake e ngā iwi 16, ko te iwi o Piripi a Te Rarawa tētahi o ērā ka whakatū i te mema-ā-iwi mō Te Tai Tokerau/Tāmaki Makaurau. A, ka mana ngā tono o te kāhui o ngā iwi, ina hoki e ono tekau paihēneti o ngā iwi na, ka whakatū i tētahi kāhui whiriwhiri.

“He uaua pea, nā te mea he maha ngā iwi, engari ko te tikanga kia noho atu taua rohe, te Tai Tokerau nei i runga i te mita kotahi.”

E tūmanakotia ana ka tohua ngā mema katoa o Te Mātāwai hei te mutunga o Hurei, ā, ka tū te hui tuatahi a te mutunga mai o Oketopa. Otira, e matapaetia ana ka timata a rātou mahi hei te mutunga mai o te tau.