Pupū ake ana te kaikiritanga i ngā mahi keri whenua

Te Kuru o te Marama Dewes

He kōrero kaikiri kua pā atu ki ngā whānau me ngā hapū o Ngāti Kahungunu, i tā rātau tautoko kia whakapaipaitia te ara kua kaha tohea nei ki Te Mata, engari hei tā heamana o Ngāti Kahungunu hei tā Ngahiwi Tomoana ināinei kua huri ngā whakaaro, ā, ko te tokomaha tērā e tautoko atu ana kia tangohia te ara.

“I te wā i haehaetia te Pākehā nei i Rongokakao, ka tū te puehu i waenganui i a tātau te iwi Māori i waenganui i āna hoki te hapori Pākehā”, te kī a Ngahiwi Tomoana.

Ko Ngāti Kahungunu tērā i whakahē i te ara ki tō rātau tipuna maunga Rongokako, nāwai rā ka huaki atu te hapori whānui, rere atu ana ngā whakawhiu a te kaikiri.

“I tō rātau kūaretanga i aua wā, ka puta mai ngā kōrero kaikiri, uaua, ia rā ia ra, ki ngā whānau, ki ngā hapū, ūmere rātau ki a mātau, hāparangi rātau ki a mātau”, te kī a Ngahiwi Tomoana.

Nō te tau 2017 whakaaetia e te kaunihera o Heretaunga te tono a te kamupene waina o Craggy Range kia hanga i te ara, ā, nō muri mai i kī ai te kaunihera i mahue atu te kōrero ki te iwi me te hapori tūmatanui anō hoki.

“Mārama ai tātau, te rongonui o tērā i waenganui i a tātau o Ngāti Kahungunu, engari mō tātau te iwi Māori, Pākehā, Hainamana, rātau katoa haramai nei me mōhio rātau te rongonui o tērā wāhi”, te kī a Tomoana.

Hei tā tā Ngāhiwi Tomoana, e huri ana ngā whakaaro o te nuinga i ngā whakawhitinga kōrero.

“Nā te wānanga, kua wānagahia mātau ki a rātau, ka puta mai te mārama, ko te mārama o tō tātau whakaaro, o tō tātau kaupapa, mai Kahungunu”, te kī a Tomoana.

He tono tā Te Kaunihera o Heretaunga kia tangohia te ara, ā, kia whakapaipai i te whenua.