Rere ana ngā tao kupu mō te pire tuatahi a MP Whaitiri

Rere kau ana ngā tao kupu i te Minita Take Taiao, i a Nick Smith, mō te pire a Meka Whaitiri e pā ana ki Te Mana Rauhī Taiao.

Nōnanoa nei tangohia mai te pire i te pouaka e tū ai ia ki te aroaro o te Whare Pāremata mō te pānuitanga tuatahi.

Āe mārika ko te pakanga o ngā pire mō te taiao.

I raro i te pire a Reipa ka whakaurua ki te ture o Te Mana Rauhī Taiao ngā kupu rauhī taiao, he aronga hei tā rātou kaore e kaha kitea ana i te ture ahakoa koia pū tana mahi.

Ko ngā raru ki te katua o Ruataniwha tētahi tauira, hei tā Meka Whaitiri, o tā Te Mana Rauhi Taiao ngoikore ki te tiaki i te taiao.

Nō reira kua whai tautoko te pire a Meka Whaitiri i ngā Kākāriki me te Pāti Māori.  Heoi, e whakahēngia ana e Nāhinara me Act, ā, e whakaarotia tonutia ana e Aotearoa Tuatahi me United Future.

Mō te pire RMA a Nick Smith, mā nga hua o te kōwhiringa pōti motuhake ki Te Raki te whakatau.

Tūturu kotahi noa te pōti a Nāhinara e mana ai tēnā pire, nō reira ki te ngaro i a rātou te tūru o Te Raki he raru kei te haere.

Hei tā Marama Fox, “Kei te hiahia mātou ki te kōrero ki te kāwana mehemea ka taea te tīni i o rātou hiahia, nō reira kua whakarite mātou he wā kei te kōrero i roto i ngā wiki kei te heke mai.”

Mā te wā ka kite pēnā ka whitikina ēnei pire e te rā, pēnā rānei ka patua e ngā hau kerekere o te ao tōrangapū.