Rongowhakaata launch their second exhibition

Ka noho ko Rongowhakaata hei kaiwaka mō ō rātou kōrero ki te whakaaturanga tuarua o a te iwi, ko Rongowhakaata te ingoa, ki te Whare Taonga o Te Tairawhiti inanahi, te tuarua o ngā wāhanga e toru o te whakaaturanga.

I ata hāpara, muia ana te whare taonga o Te Tairāwhiti e te tini i te rā hītori nui mō te iwi o Rongowhakaata.

E ai ki tētahi Ringatoi o Rongowhakaata a Derek Lardelli, “Kua kitea nei ngā mokamoka tāngata kua rarangahia nei ki runga i Te Takapau o Rongo kua whai wā ki te noho tahi ki te kōrero tahi, ki te maumahara ki te tangi, ki te poroporoaki, ki te titiro whakarunga whakararo whakamua whakaroto koina te kaupapa o te rā nei.”

Tata ki te kōtahi rau ngā taonga i tēnei whakakitenga, ngā tāonga nō ngā rā i mua i te taenga mai o kāpene James Cook tatu noa mai ki ngā taonga mohoa.

“Tino miharo ka hoki ngā mahara ki ngā wā o mua miharo ahakoa he moe au ki roto i a Rongowhakaata ara ka whakarangatirahia āhau i a Rongowhakaata, miharo tēnei,” hei tā Paku-Jane Brown.

Hei tā tētahi Kaihautū o Te Papa Tongarewa a Arapata Hakiwai, “He roa te wā e tatari nei te iwi kia whakaatu tōna hītori tōna whakapapa ki te ao katoa kia riro mā Rongowhakaata nei e kōrero tērā.”

I whakaatuhia tuatahia o rātou kōrero i ngā whakaaturanga e rima i ngā marae ki Manutuke, mai i taua wā kua whakapuare ake tēnei whakaaturanga ki te whare taonga nei.

“Me kī rā e pupu ana te wairua, te aroha ki roto i a tātou e whakaatu ana ki te ao, tuatahi ki te rohe, ki o tātou marae hoki anō rā ki te whakaaturanga a marae mutu ana tau kōtahi kua hipa ānei rā tatou,” hei tā tētahi uri no Rongowhakaata a Taharakau Stewart.

Ka whakaatuhia te wahanga tuatoru o ngā whakakitenga nei ki te Te Papa Tongarewa ki Pōneke hei tērā tau.