Te kaiwhawhai karate tuatahi Orimipia ko Raukawa Jefferies

James Perry

Ko Raukawa Jefferies, te kaiwhawhai Karate tuatahi ka whakakanohi i a Aotearoa ki ngā Taumāhekeheke o te Ao. Ka kitea tuatahihia i te karate ki ngā taumāhekeheke rangatahi hei te tau nei. 

He 6 tau noa te pakeke o Jefferies ka ruku tuatahi ai ia ki te karate, heoi mō ngā tau e rua kua hōri kua aro pū ia ki ngā Taumāhekeheke o te Ao rangatahi. Hei tāna, nō te putanga o te kōrero kua whai wāhi atu a karate ki ngā taumāhekeheke, kua waihanga māhere e ia mē ōna hoa. Kua whawhai ia ki Koroātia, me Pukēria, ko te whāinga kia riro i te nuinga o ngā māka e āhei ai ia ki ngā Taumāhekeheke. I ea e ia tērā wāhanga, ka mutu i whakaihuwaka anō ia ki te whakataetae o Te Moana Nui a Kiwa.

He tauira a Jefferies ki te kura tama tāne o Kirikiriroa, he rite tonu tōna ekenga ki te pae o angitu i ngā whakataetae karate, mai anō, mai anō. 11 noa iho tōna pakeke ka riro e ia i te tohu whakaihuwaka o Aotearoa mo te wā tuatahi, ā kua whā anō ōna toanga. E rua hoki ōna wikitōria i ngā whakataetae o Te Moana Nui a Kiwa.

Neke atu i te tekau tau a Jefferies e whakapeto ngoi ana i Kirikiriroa, hei tā tāna kaiako i Waikato Rembuden Karate. Ki te kore a Jefferies e tae atu ki Āketina, ko Chase Hennessey tōna whakakapi, he tauira anō tērā o Waikato Rembuden. Hei tā Binh Nguyen, te kaiako o Waikato Rembuden he tūtaki noa i tāna i kī taurangi ai ki āna tauira. Ko tāna i te urutanga mai o ngā rangatahi nei, ki te hauhare rātou, ka whai hua rātou. 

He pakeke pea te māhere haratau, ka timata hei te 5.30 i te ata. Atu i te karate, ka takaro poitūkohu, poikuruwai anō hoki a Jefferies hei ngā Rātapu rā anō ia e whakatā. Hei tāna anō, he uaua māna e oho moata ai, heoi tē paraurehe.

He tātua pango, kua uru a Jefferies ki te wahanga kumite (whawhai) mō ngā tāne +68kg i Āketina. Hei te tau 2020 ka uru tuatahi ai a karate ki ngā Taumāhekeheke matua i Tokyo, hei tā Jefferies ka rawe mēnā ka whai atu ia ki Tokyo, heoi kei Parī hei te 2024 tōna tino tirohanga.

Hei te Whiringa-ā-Nuku tū ai ngā Taumāhekeheke o te Ao ki Āketina, hei ngā rangi whakamutunga rā anō o ngā taumāhekeheke tū ai ngā mahi karate.