Tē kitea te Māori i roto i ngā whakanuitanga ki Tāmaki Makaurau

Kei te hiahia a Ngāti Whātua kia nui ake te whai wāhi a te Māori ki ngā mahi whakatū i te whakataetae Ipu o Amerika kei tua.

E whai ana tēnei i te toahanga a Te Tira o Aotearoa ki runga ake o Oracle Tira o Amerika i Bermuda.

Tangi ana ko pere ko manahau i te ekenga tangaroa o Aotearoa i te whakataetae Ipu o Amerika mō te wā tuatoru.

E ai ki a Phil Goff, Tumuaki o Tāmaki Makaurau, e manawawera ana e whakahihi ana hoki ngā herenga o Tāmaki i te rironga mai o te Ipu o Amerika.

Heoi, tē kitea te Māori i roto i ngā whakanuitanga ki Tāmaki Makaurau.

E mea ana a Taiaha Hawke, Poutaki o Ngāti Whātua ki Ōrākei, “Ko tētahi mate, kāre tātou e āta kitea tētahi kanohi Māori i roto i tēnei mahi.”

He āhuatanga e manako ana kia rerekē ake ki te noho mai te Ipu ki Tāmaki Makaurau.

E kī ake a Hawke, “Me noho a Ngāti Whātua ki te taha o te tīma o Emirates Team NZ kia wherawhera i ngā kōrero me ngā tūmanako o ngā wawata i tōngia i te wā a Sir Peter Blake me Tā Hugh Kawharu neke atu i te rima tau ki muri mō ngā hiahia a te Māori kia uru ki tērā o ngā whakataetae.”

Ko Tāmaki Hereherenga waka tēnei. He hītori e tūmanako ana a Hawke kia whakamanahia ki te waka hei te whakataetae e haere ake nei.

Ki tā Hawke, “Ko tēnei momo tikanga, kāre anō kia mate ki roto i a tātou.”