Te Matatini 2015 - Pareārau

Ko Pareārau te kapa tuatahi nō Kahungunu kia tū i te rangi nei. He tuatahitanga hoki tēnei mō rātau kia tū ki tētahi whakataetae-ā-motu.

Nō te tau 2006 tīmata ai te rōpū nei i runga anō i te tono a ngā ākonga o Te Ara Reo Māori o Te Wānanga o Aotearoa kia ako i ngā waiata me ngā haka a Ngāti Kahungunu ake.

Ahakoa he tauhou rātau ki te ao whakataetae kapa haka, he whakahirahira tonu te kura huna i roto i tā rātau tū.

Hei tā Aaron Parekura Matehe ki Te Kāea, "E tūkinotia tonutia ana ā tātau tamariki pēnei i a Delcelia Witika rāua ko Jame Whakaruru. I kōhurutia rāua. Nō reira i tito tēnei haka mā rāua, mā ngā māhanga Kāhui, mā Nia Glassie, me ngā tamariki kua mate i te ringa tūkino."

E ai ki te kaiako, ki a Jackie Irihuia, He hōnore nui tēnei ki a mātau. He tuatahitanga hoki tēnei mō mātau, ahakoa i tīmata kē mātau hei tira ngahau. Heoi, ko te whāinga matua i tēnei wā, kia tū hei māngai, hei kanohi hoki mō Ngāti Kahungunu, Rongomaiwahine.

Ko ngā kaiako i tēnei tau ko Jackie Irihuia Ham, ko Matewai Timu-Fosio, rātau ko Aaron Parekura Matehe, ā, ko Matewai rāua ko Aaron tonu ngā kaitātaki.

Anei tētahi uiui e kōrero ana mō ngā mahi whakarite a Pareārau mō Te Matatini 2015.