Te rautaki hou e kawe ai a Whakaata Māori ki Te Huapae o te Rangi

James Perry

Kua whakaputa a Whakaata Māori i tana anga whāinga hōu hei arataki i a ia ki anamata.

Ko Te Huapae ka whakatau i te kaimātakitaki, me ōna hoa whakahaere ki te pūtake o ana hōtaka me ana whakapaohotanga, i te ao pāpaoho pāhekeheke nei.

Ko te whāinga nui mō Whakaata Māori ko te taka kai e rata nei e te marea. Hei tā Shane Taurima, Tāhūhū Rangapū o Whakaata Māori "Ki te kore e tahuri mai ki te kai i ngā kai a Whakaata Māori, kāore he take o Whakaata Māori."

Nō reira kua whakaritehia e Whakaata Māori kia whakahoki kōrero te hunga mātakitaki e mōhio pai ai te kaipāpaho he aha tā rātou e tino hiahia nei "ko wai rā te hunga e mātakitaki ana i ngā hōtaka, he aha anō hoki ō rātou hiahia ngā wā e pīrangitia ana ēnei hōtaka me pēhea anō hoki ngā hōtaka ērā āhuatanga katoa. Kaua noa iho mātou a Whakaata Māori e noho ki rahaki whakaaro ake ai a, anei, anei anei." 

Koirā tētahi wahanga o te mahere rautaki, o Te Haupae, he mahere e whakahau nei i te ara ka whāia e Whakaata Māori a ngā tau tata nei, "me te aha, te mea nui rawa anei anō hoki ngā ine, hei whakaatu ā e whai hua ana ngā mahi a Whakaata Māori, e pēhea ana rānei," te kōrero a Taurima.

Hei te paunga o tēnei marama whakaterea e Whakaata Māori i te waka rangatahi. He kohinga hōtaka, nā te rangatahi, mā te rangatahi, mō te rangatahi. Hei tā Taurima, "mehemea ko te rangatahi te whai, mā te hunga rangatahi anō te hunga rangatahi e tō mai.

"ko tā whakaata Māori he whakamana i a rātou i te hunga rangatahi, ka tahi. He tuku i ngā rauemi ki a rātou, ka rua, me te whakawātea i te huarahi ki a rātou ki te waihanga i ngā kaupapa e pārekareka ana ki te hunga rangatahi."

Ehara anō ko te hunga rangatahi anakē ka whai hua i te aronga anamata nei, "kei wareware i a tātou te hunga pakeke, o tātou kaumātua, kuia, koroua e kaha tautoko tonu mai nei i a Whakaata Māori, me hora anō he kai ki mua i a rātou hei kai, hei timotimo mā rātou," tā Taurima.

Ka tūwhera te kuaha mō ngā whakaaro o te hunga mātakitaki tae atu ki te toru tekau o tēnei marama.