Te wero ki a Ngāi Rangatahi Māori ki te tuku pōti

Neke atu i te whitu mano ngā uri Māori kua tangohia ake i te rārangi pōti o te motu, i te korenga o ō rātou pārongo, pēnei i ngā tūranga noho, e whakahōungia.

Nā reira ka uaua ake pea te ara akiaki i te hunga Māori kia pōti, mātua rā, te hunga mātātahi.

Kua reia ngā tiriti ki ngā pānui, ō rātou kanohi e kitea ana ki wī, ki wā, engari kei te mōhio rānei te taiohi Māori ko wai rātou?

He wāhi pōti nui a Ikaroa-Rāwhiti mai i te Rāwhiti heke atu ki te Whanganui a Tara, he waru tekau mā rima mano neke atu ngā tāngata e noho ana ki konei, ā, ko te nuinga o ngā utu a tau o te Māori kei raro iho o tā te motu, ara, he rua tekau mā whā mano tāra.

E ai ki ngā tatauranga ko Ngāi Māori ngā mea e kore e tuku pōti.

I te rārangi pōti he neke atu i te whā tekau mano ngā ingoa i whakakorengia.

O taua nama, he whitu mano neke atu he Māori. O ngā Māori i whakakorengia, he tata ki te whā mano nō te rārangi pōti Māori.

He waru tekau mā rima ōrau o te rohe pōti o te Ikaroa-Rāwhiti he Māori, ko te āhua nei he mahi nui, kei mua i ēnei kaiwhakataetae ki te aru pōti te iwi Māori.