Kua puea ake anō te whawhai mauroa i waenga i ētahi kura Māori whai mana nui.
I pakanga anō ngā tauira tawhito o Tipene me te kāreti o Te Aute ki te hui taurima a Te Aute i Te Matau a Māui. Ā, ahakoa kua kaumātua haere ētahi, e tere tonu ana te rere o te whanaungatanga i waenga i ngā taha e rua.
Hoariri ki te hoariri. Ko ngā raukura o ngā kura Māori e kōkiri nei ki te pakanga o te wā.
Hei tā Les Hoerara (Te Whānau a Tūwhakairiora, Te Whānau a Hunaara), “Ko te harikoa ko tēnei kēmu, he mea hei tāti mai i te kaupapa me kii rā, he tūhonohono anō i ngā kura e rua me te whakawhanaungatanga.”
Ki te kāreti o Te Aute whakarauika atu ai ko ngā mana nui o te kāreti o Tipene me Te Aute tonu. Nō te hui taurima a Te Aute te reo rāhiri i ngā iwi. Inā te tini tāngata i puta mai hei hāpai tonu i te hautoa o tō rātou ake kura.
Ko tā Arama Koopu (Te Whānau a Apanui, Ngāti Porou), “Ahakoa kua kaumātua mātou kei reira tonu te hiahia ā kei reira hoki te mamae i ngā waewae me ngā tinana.”
Katoa katoa he tautoko i te mana mātauranga Māori mā roto mai i te hākinakina.
“Ahakoa kua katia a Tipene, kei te ora tonu i roto i te ngākau o ngā tama tawhito,” hei tā Te Aorere Ridell (Ngāti Porou).
Ko tā Koopu, “Ko te whanaungatanga i raro i te marumaru o ā tātou kura Māori”
Ā, e oma ana ngā waewae mō te whakaemi pūtea te take. Mō te tūpono whakapuare anō a Tipene, i katia i te tau rua mano.
“Ahakoa ko te whutupōro te take matua, engari ko te kohi moni mō te kura te take hei hāpai ake i te kaupapa o tēnei rangi,” tā Hoerara.
Hei tā Ridell, “Kei te puare tonu ō rātou ngākau, kei te puare tonu ngā tatau o te kura o Tipene.”
Me te mahara tonu anō rā ki ērā o ngā taniwha hikuroa i takahia ai ngā papa o ēnei kura Māori e rua
“Me te hoki whakamuri ngā mahara ki ōku tini hoa kua tiraha. Mai i te kura o Tipene, ko Hoani Waititi tērā, ko Scotty McPherson tērā, ko Te Rāwhiti Ihaka tērā te nui o rātou,” ko tā Ridell.
Kāore he kahore, ko te whāinga matua o te rā i tutuki.
Ko tā Koopu, “Ko te whanaungatanga i runga i te whiira, ko te whanaungatanga o waho atu, me te whanaungatanga o ngā tamariki kua tae mai kei ngā kura.”
Me te manako nui a ngā kaiwhakahaere, kia pēneitia ngā whakahaere ia te tau, ia te tau
“Ko te toa o te rā, e ai ki te whutupōro, ko ngā kura e rua,” hei tā Hoerara.
Mō te mana o ngā kura Māori, ki tua, ki te raurangi.
