Tokorua ngā kaitoi i whānau mai i te Czech Republic kei te aronuitia

Ki te whenua o Czech Republic, kua tika katoa rā te whare mō te whakapuakitanga o ngā peita a te ringa toi a Gottfired Lindauer mō ngāi Māori o Aotearoa ki ōna huānga o tōna whenua ūkaipō. 

Kei konā a Dean Nathan e whakapūrongo mai ana i ngā whakanekeneke ā, nōna e karore ana i te taone o Pilsen, i kitea e ia tetahi pukenga kahore e tino rereke ake ona ahuatanga ki to Gottfried Lindauer.

Kua tohua a Pilsen hei kainga matua o tēnei mea te ahurea mō tēnei tau puta noa i Iuropi Whanui.  Nā kei te whakamīharo a Te Kāea i tēnei ra ki te whakaaturanga nā tētahi anō o ngā uri o Pilsen ko tōna rite kia Gottfried Lindauer ko te mea horekau anō raua kia whiwhi noa ki ngā hōnore e tika ana mō a rāua mahi rangatira.

Ko ngā kōrero paki tētahi noa iho o ngā pukenga whānui a Jiri Trnka kua mau ki ngā whakatupuranga o tēnei whenua. 

Neke atu i te ono rau katoa ngā kaupapa kua oti te whakarite i tēnei tau ki te kainga matua o ngā mahi ahurea o Iuropi. Ko te whakaaturanga o Lindauer tētahi o ngā tino.

Ina te whānui o ngā pukenga o Jiri Trnka i kīa ai ko ia te Walt Disney ki te whiti o Iuropi ara he kaihanga karetao, he kaipakiwaituhi i ngā pikitia, he ringatohu me tana rongonu hei kaiwhakāri pikitia ki ngā pukapuka mō ngā tamariki. 

He rā nui anō ki konei āpōpō e te iwi,  ana ko te ahurei kotahi wiki te roa e whakanui ana i te huritau whitu tekau nō te wewetetanga o ngā Marikena i tēnei taone o Pilsen mai i ngā tikanga here o Tiamana.  

Hei reira tukuna atu ai ngā whakaahua o tēnei kaupapa whakahirahira kia koutou.