Waikato Tainui outraged over proposed land sales

E takariri ana a Waikato Tainui ki te kamupene Solid Energy mō te hokotanga atu o ētahi whenua ki Rāhui Pōkeka, kua herea i raro i te mana hoko tuatahi. Koirā tā Rāhui Papa, heamana o Te Ara Taura, ka mutu, he tuku tono te mahi a Waikato-Tainui ki te kōti teitei i Ōtautahi i te rā nei ki te aukati i te hoko whenua nei. Kei a Mānia Clarke te roanga atu.

Anei te tuawhenua ki Rāhui Pōkeka, kei te iho o te tohe i waenga i te iwi o Waikato-Tainui me te kamupene ā-kawana a Solid Energy.

Hei tā te Māngai mo Waikato-Tainui a Rahui Papa, “E whakarikarika katoa ana te iwi, ana, ki tā mātou titiro, kua karo kua tītaha te āhuatanga o te First Right of Refusal, e Solid Energy ki te whakahoki tuatahi mai ngā whenua ki a Waikato-Tainui, katahi.”

Kua whakarārangihia e Solid Energy ngā whenua whāngai kau waiū, huanga kai, kaikai hoki, e whā RAU ono tekau mā whitu heketea hei hoko, mā te rōpū hoko whare o Bayleys.  

E ai ki a Papa, “He nanakia te mahi, koianei ko te āhuatanga, ko ngā whenua o te raupatu, e mōhiotia ana e Solid Energy, me whakahoki tuatahi mai, hei whakaarotanga mā Waikato-Tainui, engari ki tētehi wāriu o te mākete.  Tā rātou wāriu, tā mātou wāriu i reira, ka whakawhitiwhiti kōrero, ka mutu i kōnei.  E hiahia ana rātou kia tūari whānui tonu atu rā i te ao, katahi ka whakahoki mai ka kite ake i te wāriu, kua tino piki haere nei.”

Nō te marama o Akuhata, i tērā tau, ka pakaru te pūkoro o Solid Energy nā reira, ka riro mā ō rātou rawa e whakaea ō rātou nama, toru RAU mīriona tāra ki ngā pēke.  Ka tīmata te kōrero atu ki a Waikato-Tainui, heoi, nā wai rā, auare ake.

“Nō te tau kua mahue atu nei, ngēnā kōrero, engari, nō te pito whakamutunga o te tau, ka haukotia katoatia ngā kōrero, ka mate katoa ngā kōrero i konā, ka rongo mātou, e hiahia ana ki te hokohoko haere ki ngētehi atu o te ao,” hei tā Papa

E ai ki te Tumuwhakarae o Solid Energy ki a Dan Clifford, “Mō te wāhanga hoko i ngā rawa katoa, he haepapa tā Solid Energy kia tika, kia mārakerake, kia hāngai hoki te hoko utu ki tā te wāriu o te mākete, kia tutuki pai ai te mana hoko tuatahi o Waikato-Tainui i raro i te ture Mahi Tūmatanui.

Ka mutu, e maia ana rātou, kua whai rātou i ngā tukunga i raro i te tika me te ture.”

Ka haere tonu ngā kōrero a te iwi mō te take nei ki ngā hui, whērā i ngā poukai.