Waikato-Tainui selling shares in Hamilton shopping centre

E hoko atu ana te ringa pakihi o Tainui, a Tainui Group Holdings kia rima tekau ōrau o ā rātou hea i te whare hoko maha o The Base ki Kirikiriroa, mō te kotahi rau, e iwa tekau mā rua, ira rima mīriona tāra.  Hei tā Rahui Papa, heamana o Te Arataura mā konei e tāea e te iwi ō rātou whāinga atu i te pūtea, te whakatutuki. 

Mā te whiwhinga pūtea nei, ka tāea te iwi o Waikato-Tainui te aro ki ngētehi atu kaupapa nui.

Hei tā te Heamana o Te Ara Taura a Rahui Papa, “Ka tāea ai te whakapiki i te wāriu o te whika e tohatohaina ai ki ngō tātou iwi- kia nui ake te whenua, kia nui ake ngā mahi, kia nui ake te moni, hei whakahaere I ngā whakahaere ā ngā hapori o Waikato-Tainui.”

Kua hokona e te kamupene o Kiwi Property ngā hea, ka riro i a rātou ngā rīhi mō te kotahi RAU rua mano, engari anō mō te whenua, ka pupurutia tonutia e te iwi i raro i te taitara whenua o Pōtatau Te Wherowhero.

Hei tā Papa anō, “I roto i te kotahi rau rua tekau tau, ka hoki mai katoa, Kāore te whenua e riro, ka noho tonu ki a mātou, engari ko ngā whakahaere i runga i te whenua ka hoki mai katoa mai ki a mātou.”

E whia marama a Tainui Group Holdings e whakaaroaro ana i ngā tono nō rāwaho me Aotearoa, ka whakatauria ko te kamupene haumi nō Aotearoa.

“He tohunga rātou ki te whakahaere ēnei shopping centres, nō reira, ko rātou pea tētehi o ngā hoiho e omaoma ana i te omanga roa, kua roa rātou i roto o Aotearoa,” hei tā Papa.

Kei runga i te tēpu tētehi anō tono nā te kamupene o Kiwi Property i tuku, hei hoko i te toenga o ngā hea ki The Base, he kotahi rau iwa tekau mā whitu ira rima mīriona tāra te wāriu.  Ka ata whiriwhiri te ringa pakihi o Tainui, me te iwi i te tono nei, hei ngā wiki e tū mai nei.

E ai ki te mema paremata nō te roopu reipa a Nanaia Mahuta, “Me waiho, me āta titiro ki ngā hua o tēnei tutukitanga, kia kite i ngā hua, i mua i te hokonga atu o te katoa.”

Ka pupurutia e te iwi kia kotahi heketea o te whenua, kia hanga i tētehi Whare Whānau Ora pea, hei te wā heke mai. Ko tōna tikanga ka oti te hokonga nei hei te rā toru tekau mā tahi o Mei.