Whakatū meat workers reunite

E toru tekau ngā tau mai i te katinga o te whare patu mīti nui rawa o Aotearoa ki Whakatū, kei te whakarauika mai ētahi o ōna kaimahi o mua ki te whakamaumahara ki a rātou mā kua mene atu ki te pō. Haunga rā te rū whenua i Ahuriri o te tau tahi mano iwa rau toru tekau mā tahi, te parekura nui rawa ia i pā ki Te Matau a Māui, e rua mano ngā tūranga mahi i poroa. 

Kua hipa te toru tekau tau mai i te kapinga o te whare patu mīti nā wai ra kei te mihi, kei te hoki ngā mahara a ngā hoa o mua.

Hei tā tētahi kaimahi o mua a Ngatai Konia, “Ko te wairua ka whakaarahia ake i tēnei rā hei aha hei taonga maumahara mō mātou katoa o rātou rā kei roto i ngā ringa o to tātou Matua Nui i te Rangi.”

Ko te rā tuangahuru o Oketopa i te tau kōtahi mano iwa rau waru tekau mā ono, kua noho pōkaikaha te rohe nā te kore mahi, kua tau hoki ngā pānga kino ki te hapori.

E ai ki tētahi kaimahi o mua a Bevan Taylor, “Ka rongo ki te pouaka whakaata, ae, kua kaati hoki, ka noho au ki tōku nei moenga, pouri ana ka puta ngā roimata, ka kaati hoki tō tātou nei tino mahi.”

E ai ki ngā ripoata tawhito, i heke te nama o ngā hipi nā reira, kua kati taua whare patu miiti kia tūwhera tonu ngā whare patu mitti kē atu i te motu.

Hei tā tētahi kaimahi o mua a Ngahiwi Tomoana, “I haere ki wiwi ki wawa te katoa o mātou kia kimi ora kia whai rawa ka tutaki i nga waahi kē i ngā taone kē i ngā motu kē puta noa o te ao hei oranga mō te whānau.

Ka whakahōnore tonu te hapori o Whakatū ki te whakapeto ngoi o aua kaimahi me a rātou whānau.